ایلون مسک کے غربت سے متعلق دعوے پر والد کے بیان نے حقیقت سے پردہ اُٹھا دیا

Feb 1 2025 | ویب ڈیسک

دنیا کے امیر ترین انسان ایلون مسک کے والد نے ان سے متعلق غربت کے دعووں کو مسترد کرتے ہوئے اہم انکشافات کر دیئے۔
غیر ملکی میڈیا رپورٹ کے مطابق ایلون مسک کے والد ایرول مسک نے بتایا کہ یہ دعویٰ غلط ہیں کہ ایلون کا بچپن بہت مشکل تھا۔ ایرول مسک کا کہنا ہے کہ ایلون کو ایک لگژری رولز روائس میں اسکول لے جایا جاتا تھا اور جب وہ جوان تھے تو ان کی اچھی طرح دیکھ بھال کی جاتی تھی۔
رپورٹ کے مطابق تقریباً دو سال قبل ایلون مسک نے ایک انٹرویو میں کہا تھا کہ ان کا بچپن خوشگوار یا دولت مند نہیں تھا، مجھے وراثت میں کچھ نہیں ملا، اور نہ کبھی کسی نے مجھے قیمتی تحفہ دیا۔
جس پر ان کے والد نے حقیقت بیان کرتے ہوئے کہا کہ ایلون دراصل بے پناہ دولت اور آسائشوں کے ساتھ پلا بڑھا ہے۔
رپورٹ میں کہا گیا کہ ایرل مسک بنیادی طور پر جنوبی افریقہ کے شہری ہیں، جو انجینئر اور بزنس مین ہیں، انہوں نے اپنے بیٹے کی زندگی کو کامیابی سے ڈھالنے میں ٹیکنالوجی اور انفرادیت کا استعمال کیا۔
انٹرویو میں ایرل مسک نے حیران کن انکشاف کرتے ہوئے کہا کہ میں نے 24 برس کی عمر میں اپنا کاروبار شروع کیا تھا جس میں مجھے یہ آزادی بھی ملی ہوئی تھی کہ دن کا بڑا حصہ اپنے گھر میں اپنے بچوں کے ساتھ گزار سکوں۔
انہوں نے بتایا کہ 23 یا 24 سال کی عمر میں اپنا ذاتی جہاز خریدا، اور 26 برس کی عمر میں گھر خریدا تھا، جس میں ایلون مسک کا بچپن گزرا، جہاں اب جنوبی افریقہ میں یورپی یونین کے سفیر کی سرکاری رہائش گاہ بھی موجود ہے۔
واضح رہے کہ ٹیسلا، اسپیس ایکس اور سوشل میڈیا پلیٹ فارم ایکس کے مالک، ٹیک جائنٹ ایلون مسک کا شمار دنیا کے امیر ترین لوگوں میں ہوتا ہے جن کی دولت کا تخمینہ 426 بلین ڈالرز لگایا جاتا ہے۔