20 سالہ لڑکی کو زہر دے کر قتل کرنے کا لرزہ خیز واقعہ، بہنوئی سمیت 5 ملزمان گرفتار

Feb 4 2025 | ویب ڈیسک

راولپنڈی کے تھانہ جاتلی کے علاقے میں 20 سالہ لڑکی کو زہر دے کر قتل کرنے اور لاش دفنانے کے مقدمے میں اہم پیش رفت ہوئی ہے۔ پولیس نے واقعہ میں ملوث 5 ملزمان کو گرفتار کر لیا ہے، جن میں مقتولہ کا بہنوئی، اس کے والدین، بہن اور ایک پڑوسی شامل ہیں۔
ابتدائی تحقیقات کے مطابق مقتولہ کو اس کے بہنوئی گلفراز عرف گلو اور پڑوسی محمد امین نے مبینہ طور پر زیادتی کا نشانہ بنایا۔ جب مقتولہ حاملہ ہو گئی تو چاروں ملزمان نے منصوبہ بندی کرکے اسے زہر دے کر قتل کیا اور فوری تدفین کروا دی۔
اطلاع ملنے پر پولیس نے قبر کشائی کرکے مقتولہ کا پوسٹ مارٹم مکمل کرایا۔ پوسٹ مارٹم اور فرانزک رپورٹ میں مقتولہ سے زیادتی اور زہر دینے کے ٹھوس شواہد سامنے آئے جس کے بعد پولیس کی مدعیت میں قتل کا مقدمہ درج کر لیا گیا۔
پولیس کے مطابق گرفتار ملزمان میں گلفراز عرف گلو (بہنوئی) محمد امین (پڑوسی) گلزار بیگم (پھوپھی و بہنوئی کی والدہ) انیلہ بی بی (بہنوئی کی بہن) شامل ہیں۔
پولیس نے ایک اور ملزم وجاہت کو بھی گرفتار کیا ہے جو مرکزی ملزم گلفراز کی گاڑی چلاتا تھا۔ گرفتار ملزمان 4 روزہ جسمانی ریمانڈ پر پولیس حراست میں ہیں اور تفتیش جاری ہے۔
سی پی او راولپنڈی سید خالد ہمدانی کا کہنا ہے کہ پولیس کیس کی میرٹ پر تفتیش کرے گی اور ملزمان کو ٹھوس شواہد کے ساتھ چالان کیا جائے گا۔ انہوں نے کہا کہ افسوسناک واقعے میں ملوث افراد کو قرار واقعی سزا دلوانے کے لیے تمام قانونی تقاضے پورے کیے جائیں گے۔
سی سی پی او خالد ہمدانی نے کہا کہ راولپنڈی پولیس ہر مظلوم کے ساتھ کھڑی ہے اور انصاف کی فراہمی کو یقینی بنایا جائے گا۔

Views= (387)