تیسرا بچہ پیدا کرنے پر خاتون کو 50 ہزار روپے، لڑکا ہوا تو گائے بھی ملے گی

Mar 12 2025 | ویب ڈیسک

آپ نے ایک نعرہ ضرور سنا ہوگا کہ 'بچے 2 ہی اچھے'، جو کہ خاندانی منصوبہ بندی اور آبادی پر قابو پانے کے لیے استعمال کیا جاتا ہے۔
یہ نعرہ لوگوں کو ترغیب دیتا ہے کہ وہ زیادہ بچے پیدا کرنے کے بجائے محدود اور خوشحال خاندان کی طرف توجہ دیں۔
لیکن دنیا میں سب سے زیادہ آبادی والے ملک بھارت کی ایک ریاست میں خواتین کو تیسرا بچہ پیدا کرنے کا مشورہ دیتے ہوئے انہیں خصوصی انعام دینے کا اعلان کیا گیا ہے۔
بھارتی میڈیا کے مطابق ریاست آندھرا پردیش کے وزیر اعلیٰ چندرابابو نائیڈو کی طرف سے زیادہ بچوں کی پیدائش پر مراعات دینے کی حمایت کے بعد، تیلگو دیشم پارٹی( ٹی ڈی پی) کے ایم پی کالیستی اپالا نائیڈو نے اعلان کیا ہے کہ جو خواتین تیسرے بچے کو جنم دیں گی انہیں 50 ہزار روپے انعام میں دیے جائیں گے۔
انہوں نے یہ بھی اعلان کیا کہ اگر خاتون کے ہاں تیسری اولاد بیٹا ہوئی تو اسے ایک گائے بھی انعام میں دی جائے گی۔ یہ نقدی رقم وہ اپنی تنخواہ سے ادا کریں گے۔
بھارتی میڈیا کے مطابق ایم پی کالیستی نے یہ اعلان ہفتے کو عالمی یوم خواتین کے موقع پر منعقدہ ایک تقریب میں کیا۔
تیلگو دیشم پارٹی کے ایم پی کا یہ اعلان سوشل میڈیا پر تیزی سے وائرل ہو رہا ہے۔ ٹی ڈی پی کے رہنما اور کارکنان اس پیشکش کو اپنی سوشل میڈیا پوسٹس میں شیئر کر رہے ہیں۔
ٹی ڈی پی کے رہنماؤں کے مطابق خواتین اس پیشکش کو ایک انقلابی اقدام کے طور پر سراہ رہی ہیں۔
یاد رہے کہ گزشتہ دنوں نئی دہلی کے دورے کے دوران آندھرا پردیش کے وزیر اعلیٰ نے جنوبی بھارت میں گرتی ہوئی آبادی پر تشویش کا اظہار کیا تھا اور کہا کہ بوڑھی ہوتی آبادی چیلنجز پیدا کر رہی ہے۔
انہوں نے آبادی پر قابو پانے کے بجائے زیادہ بچے پیدا کرنے کی ضرورت پر زور دیا تھا۔

Views= (69)