انٹرنیٹ پر دھوم مچانے والی یہ باڈی بلڈر دُلہن کون؟

Mar 2 2025 | ویب ڈیسک

ہر لڑکی کے لیے اس کی شادی کا دن بے انتہا خاص ہوتا ہے جس کے لیے وہ بہت پہلے سے منصوبے بنانا شروع کردیتی ہے اور ہر لڑکی کی اپنے بڑے دن کے حوالے سے مختلف سوچ اور خواہش ہوتی ہے۔ تاہم معاشرے میں رائج رویوں کے تحت دُلہن دُلہا سے ایک روایتی مخصوص انداز میں فٹ ہونے کی توقع کی جاتی ہے۔ ایک باڈی بلڈر دُلہن نے ان اصولوں کو توڑتے ہوئے نہ صرف کھل کراپنی شادی کا جشن منایا بلکہ رائج اصولوں پر سوال اٹھا کر ثابت کیا کہ خوبصورتی صرف نزاکت اور مخصوص انداز سے ہی وابستہ نہیں ہے۔ بھارتی ریاست کرناٹک سے تعلق رکھنے والی چترا پرشوتھم ایک باڈی بلڈر ہیں جنہوں نے حال ہی میں اپنے غیر روایتی دُلہن کے فوٹو شوٹ کے لیے سرخیوں میں جگہ بنائی ہے۔ دُلہن نے شادی کی مروجہ لُکس پر سوال اٹھائے اور روایت اور طاقت کا خوبصورت امتزاج دکھا کر انٹرنیٹ پر دھوم مچا دی ہے۔ چترا جلد ہی اپنی زندگی کی محبت سے شادی کریں گی، اور اپنی شادی سے پہلے انہوں نے اپنی شادی سے پہلے کی شوٹ کی کچھ تصاویر شیئر کیں۔ اس انوکھی دُلہن کی تصاویر اور ویڈیوز تمام سوشل میڈیا پلیٹ فارمز پر وائرل ہو چکی ہیں جن کو خوب تعریفیں موصول ہورہی ہیں۔ شادی کے موقع پر چترا نے پیلے اور نیلے رنگ کی کانجی ورم ساڑھی پہنی اور ساتھ بلاؤز نہ پہننے کا انتخاب کیا جس نے ان کے محنت سے بنائے جسم کو بہترین لُک میں پیش کیا۔ دُلہن نے اپنی اس منفرد لک کے لیے روایتی سونے کے زیورات کا استعمال کیا، جس میں تہہ دار ہار، کمربند، چوڑیاں، مانگ ٹیکا اور بالیاں شامل تھیں، ساتھ ہی اپنے میک اپ کے لیے انہوں نے سیاہ آئی لائنر سے سجی آنکھوں، گہرے جامنی رنگ کی لپ اسٹک اور بندی کو چنا۔ جب یہ تصاویر ڈسکشن پلیٹ فارم ریڈاٹ پر وائرل ہوئیں تو نیٹیزنز نے چترا کی تعریف اور حمایت کی۔ ایک صارف نے لکھا کہ ’جب تک وہ (دُلہن) خوش ہیں کسی چیز سے فرق نہیں پڑتا‘، ایک اور صارف نے لکھا کہ ’وہ خوش اور جسمانی طور پر فٹ نظر آتی ہیں۔ کیا یہ وہ چیز نہیں ہے جو ہر کوئی چاہتا ہے؟ ایک صارف نے چترا کو ملکہ قرار دیتے ہوئے لکھا کہ ’کوئین ایسی نظر آتی ہے، وہ بالکل خوبصورت ہے۔ تاہم کچھ افراد نے انہیں تنقید کا نشانہ بھی بنایا، تاہم نیٹیزنز کی بڑی تعداد نے اعتراف کیا کہ چترا نے اپنی فٹنس میں جو محنت کی ہے وہ قابل تعریف ہے۔ چترا پرشوتھم ایک باڈی بلڈر اور ٹرینر ہیں۔ اگرچہ یہ پہلی بار ہو سکتا ہے کہ وہ دُلہن کے طور پر وائرل ہوئی ہوں لیکن یہ پہلی بار نہیں ہے کہ وہ لائم لائٹ میں آئی ہوں۔ انہوں نے کئی اہم ٹائٹلز اپنے نام کر رکھی ہیں جن میں مس انڈیا فٹنس اینڈ ویلنس، مس ساؤتھ انڈیا، مس کرناٹک، اور مس بنگلورو شامل ہیں۔

Views= (937)