سوشل میڈیا صارفین ’پاکستانی ایشوریا رائے‘ پر دل ہار بیٹھے، وڈیو وائرل

سوشل میڈیا صارفین ’پاکستانی ایشوریا رائے‘ پر دل ہار بیٹھے

Sep 8 2023 | ویب ڈیسک

بالی ووڈ کی حسین ترین اداکارہ ایشوریا رائے کے پاکستانی ورژن نے سوشل میڈیا پر تباہی مچا رکھی ہے، وہی بڑی بڑی ابر آلود آسمان سی سرمئی آنکھیں، وہی تیکھے نین نقش اور وہی مشرق تا مغرب پھیلی کھلتے گلاب جیسی مسکراہٹ۔
دیکھنے والوں کا معلوم نہ ہو کہ کنول چیمہ، ایشوریا کی ہم شکل ہیں تو شاید کوئی پہچان بھی نہ پائے۔
بولی وڈ اسٹار اور سابقہ مس یونیورس ایشوریا رائے سے مشابہت رکھنے والی پاکستانی خاتون کنول چیمہ نے سوشل میڈیا صارفین کے رونگٹے کھڑے کردیے ہیں۔
کنول چیمہ کی ویڈیو خوب وائرل ہورہی ہے، جس میں ان کی امیتابھ بچن کی بہو ایشوریا رائے سے ہوبہو مماثلت حیرت انگیز ہے۔
کنول چیمہ کوئی معمولی شخصیت نہیں بلکہ ”مائی امپیکٹ میٹر“ کی بانی اور پورے مشرق وسطیٰ اور افریقہ میں پہلی خاتون انجینئر ہیں۔
آسٹریلیا سے تعلیم یافتہ کنول چیمہ کمپیوٹر انفارمیشن سسٹم کمپنی کی واحد خاتون انجینئر اور ڈائریکٹر رہی ہیں۔
کنول چیمہ ”مائی امپیکٹ میٹر“ نامی ایک آن لائن پلیٹ فارم چلا رہی ہیں جو شفاف، قابل بھروسہ اور مساوی عطیہ کی منتقلی کو یقینی بنانے کے لیے ٹیکنالوجی کا استعمال کرتا ہے۔
لیکن انہوں نے ایشوریا سے مماثلت پر مایوسی کا اظہار کیا۔
وائرل ویڈیو میں، رپورٹر کو کنول سے یہ پوچھتے ہوئے سنا گیا ہے کہ ’ایشوریا رائے سے موازنہ کرنا کیسا لگتا ہے؟‘
جس کے جواب میں کنول نے اعتراف کیا کہ ان کا اکثر بالی وڈ سپر اسٹار سے موازنہ کیا جاتا ہے لیکن وہ اس موازنہ کو بالکل پسند نہیں کرتیں۔
اس میں کوئی شک نہیں کہ کنول ایشوریا سے مشابہت رکھتی ہیں، جس طرح سے وہ سیاہ آئی لائنر سے اپنی آنکھوں کا خاکہ پیش کرتی ہیں وہ بھی بالکل اسی طرح ہے جیسے ایشوریا اپنی آنکھوں پر پسند کرتی ہیں۔