پرواز کے دوران مسافر نے طیارے کا دروازہ کھول دیا، خوفناک ویڈیو

سیئول: جنوبی کوریا میں فضا میں بلند ایک طیارے میں مسافر نے دروازہ کھول دیا جس کے بعد مسافر ہوا کے خوفناک جھکڑوں کی زد میں آگئے، واقعے کی ویڈیو سوشل میڈیا پر وائرل ہورہی ہے۔
بین الاقوامی میڈیا کے مطابق یہ واقعہ جنوبی کوریا کے جنوبی جزیرے جیجو سے جنوب مشرقی شہر ڈائیگو جانے والی ایشیانا ایئر کی پرواز میں پیش آیا۔
ایئر لائن اور سرکاری حکام کا کہنا ہے کہ ایمرجنسی ایگزٹ کے پاس بیٹھے ایک مسافر نے ایک لیور کھینچا جس سے دروازہ کھل گیا، اس وقت طیارہ زمین سے تقریباً 200 میٹر (656 فٹ) بلندی پر تھا اور لینڈنگ کی تیاری کر رہا تھا۔
بعد ازاں طیارہ کامیابی سے منزل مقصود پر لینڈ کرگیا، طیارے کے لینڈ کرتے ہی دروازہ کھولنے والے مسافر کو حراست میں لے لیا گیا۔
سوشل میڈیا پر وائرل ویڈیو میں دیکھا جاسکتا ہے کہ طیارے کا دروازہ کھلا ہے اور ہوا کے جھکڑوں سے مسافر خوفزدہ ہیں۔
طیارے میں 194 افراد سوار تھے جن میں کچھ کھلاڑی بھی تھے جو ٹریک اینڈ فیلڈ مقابلوں میں حصہ لینے کے لیے مشرقی شہر السان جا رہے تھے۔
حکام کا کہنا ہے کہ واقعے میں 9 مسافر معمولی زخمی ہوئے جنہیں اسپتال منتقل کیا گیا، دیگر مسافر بے حد خوفزدہ تھے جنہیں ہر ممکن مدد فراہم کی گئی۔

Views= (1216)

Join on Whatsapp 1 2

تازہ ترین