خاتون نے فریاد لے کر گورنر ہاؤس کے باہر لگی گھنٹی بجا دی

کراچی: گورنر ہاؤس کے باہر لگی گھنٹی شہریوں کی امید بن گئی ہے، کراچی کے علاقے بفرزون کی رہائشی فریاد لے کر گورنر ہاؤس پہنچ گئی۔
تفصیلات کے مطابق کراچی میں گورنر ہاؤس کے باہر لگی گھنٹی کا مقصد پورا ہونے لگا ہے، ایک خاتون نے فریاد لے کر گورنر ہاؤس کے باہر لگی گھنٹی بجا دی۔
خاتون نے گورنر سندھ سے شکایت کی کہ انھیں پولیس کی مدد سے گھر سے زبردستی بے دخل کر دیا گیا ہے، شکایت پر گورنرسندھ نے متعلقہ حکام سے رابطہ کیا، بعد ازاں تیموریہ تھانے میں مقدمہ درج کروا دیا۔
گورنر سندھ کامران ٹیسوری نے خاتون کو گھر سے بے دخل کرنے والوں کے خلاف کارروائی کی ہدایت کی، جس پر فوری طور پر عمل کیا گیا اور متاثرہ خاتون کو دوبارہ گھر میں رہائش کروائی گئی۔
گورنر سندھ کا کہنا تھا کہ دو دن کے دوران 40 سے زائد شکایات آ چکی ہیں، تقریباً 17 سے زائد شکایات کا ازالہ کر دیا گیا ہے، انھوں نے کہا کہ جب تک کرسی پر ہوں میں اور گورنر ہاؤس عوام کے لیے حاضر رہے گا۔

Views= (779)

Join on Whatsapp 1 2

تازہ ترین